ໃນຕອນບ່າຍຂອງວັນທີ່ 15 ທັນວາ 2016, ເວລາ 15:30 ໂມງ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີເປີດງານວາງສະແດງ Lao ICT Expo 2016 ຂຶ້ນ, ທີ່ຫໍປະຊຸມແຫ່ງຊາດ (ຫຼັກ 06) ຊຶ່ງງານວາງສະແດງໄດ້ດໍາເນີນເປັນເວລາ 5 ວັນ, ລະຫວ່າງວັນທີ 14-18 ທັນວາ 2016. ຫຼັງຈາກການກ່າວເປີດຂອງ ທ່ານ ປອ ທັນສະໄຫມ ກົມມະສິດ ລັດຖະມົນຕີ ກະຊວງ ປທສ. ໃຫ້ກຽດກົດປຸ່ມເປີດພິທີໂດຍ ພະນະທ່ານ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ ແລະທ່ານ ປອ ທັນສະໄຫມ ກົມມະສິດ ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າແຂວງ/ຮອງເຈົ້າແຂວງ ພ້ອມດ້ວຍຜູ້ຕາງໜ້າຈາກອົງການຈັດຕັ້ງລັດ, ເອກະຊົນ, ພະນັກງານຫຼັກແຫຼ່ງຈາກສູນກາງ ແລະທ້ອງຖິ່ນຂອງຂະແໜງ ປທສ ແລະມວນຊົນ ເຂົ້າຮ່ວມ ຫຼາຍກວ່າ 550 ທ່ານ.



  ການຈັດງານ Lao ICT Expo 2016 ໄດ້ຈັດຂຶ້ນເປັນຄັ້ງທໍາອິດຂອງ ສປປ ລາວ, ເພື່ອສົ່ງເສີມໃຫ້ພາກລັດ, ພາກເອກະຊົນ, ບັນດາບໍລິສັດ ຫຼື ນິຕິບຸກຄົນທີ່ປະກອບການດ້ານໄອຊີທີ ແລະ ໂທລະຄົມມະນາຄົມ ໄດ້ມີໂອກາດສະແດງຜະລິດຕະພັນ, ການບໍລິການ ແລະ ນະວັດຕະກຳທາງໄອຊີທີຂອງໂລກ ແລະ ຂອງຕົນ. ພ້ອມກັນນັ້ນ ກໍ່ເພື່ອແລກປ່ຽນຂໍ້ມູນຂ່າວສານ, ປະສົບການໃນການພັດທະນາຂະແໜງການໄອຊີທີ ທັງເປັນເວທີໃຫ້ຄວາມຮູ້ດ້ານໄອຊີທີ ແກ່ສັງຄົມ.
  ງານ Lao ICT Expo 2016 ນີ້ຖືວ່າ ເປັນງານໜື່ງທີ່ມີຫຼາຍສີສັນ ຊຶ່ງຜູ້ເຂົ້າຢ້ຽມຊົມງານຈະໄດ້ທັງຄວາມຮູ້, ຄວາມບັນເທີງ ແລະໂອກາດໃນການຂະຫຍາຍທຸລະກິດຂອງຕົນໃຫ້ກ້າວຫນ້າ, ທັນຍຸກທັນສະໄຫມ. ພາຍໃນງານຈະປະກອບມີ 3 ກິດຈະກຳໃຫຍ່ ທີ່ຈະຈັດໄປພ້ອມໆກັນ:

  ການຝຶກອົບຮົມ ແລະ ສຳມະນາ ທີ່ມີຫຼາຍກວ່າ 10 ຫົວຂໍ້ ແມ່ນກິດຈະກໍາສໍາຄັນໜຶ່ງຂອງງານເປັນເວທີຖ່າຍຖອດ, ແລກປ່ຽນຄວາມຮູ້ດ້ານການພັດທະນາ, ນະໂຍບາຍຕ່າງໆ ກ່ຽວກັບ ໄອຊີທີ ໂດຍມີນັກວິທະຍາກອນທີ່ມີຄວາມຊຳນານ ແລະ ປະສົບການສູງທັງພາຍໃນ ແລະ ຕ່າງປະເທດ ເຊັ່ນ: ສະຫະພາບ ໂທລະຄົມມະນາຄົມສາກົນ, ຫວຽດນາມ, ກໍາປູເຈຍ, ສິງກະໂປ, ມະເລເຊຍ ແລະ ໄທ.

  ກິດຈະກໍາຫຼັກຂອງງານແມ່ນການສະແດງສິນຄ້າໄອຊີທີ ມີບັນດາຫນ່ວຍງານຈາກພາກລັດ, ເອກະຊົນ, ກຸ່ມນັກທູລະກິດຂະໜາດນ້ອຍ, ຂະໜາດກາງ ແລະ ບໍລິສັດຫ້າງຮ້ານຕ່າງໆ ທັງພາຍໃນ ແລະ ຕ່າງປະເທດເຂົ້າຮ່ວມຫລາຍກວ່າ 50ກວ່າບູດ ເພື່ອວາງສະແດງຜະລິດຕະພັນ ແລະ ສິນຄ້າໄອຊີທີຕ່າງໆເຊັ່ນ:ເຄືອຄ່າຍ 4G, ເຄືອຄ່າຍອິນເຕີເນັດຄວາມໄວສູງ, ຜະລິດຕະພັນມືຖືສະມາດໂຟນ, ແທບເລັດ, ຄອມພິວເຕີ, ໂນ໊ດບຸກ, ໂປຣແກຣມ, ອຸປະກອນໄອຊີທີ ແລະ ອື່ນໆ.

  ໃນງານ, ກະຊວງ ປທສ ຍັງຈະໄດ້ຈັດການແຂ່ງຂັນດ້ານໄອຊີທີ ໃນງານຈະມີການແຂ່ງຂັນການພັດທະນາແຜນທຸລະກິດດ້ານໄອຊີທີ, ການພັດທະນາເວັບໄຊທ໌, ການບໍລິການ, ການນໍາໃຊ້ ICT ຂອງບັນດາກະຊວງ, ສະຖາບັນ ແລະບໍລິສັດຕ່າງໆ. ຄ່ຽງຄູ່ກັນນັ້ນ, ໃນງານຍັງມີການສະແດງສີລະປະ ເປັນຄັ້ງທໍາອິດໃນ ສປປ ລາວ ທີ່ມີການສະແດງຄອນເສີດ ຈາກສິນລະປິນທັງພາຍໃນ ແລະ ຕ່າງປະເທດຕະຫຼອດທັງ 5 ມື້.

  ທ່ານ ປອ ທັນສະໄຫມ ກົມມະສິດ ລັດຖະມົນຕີ ກະຊວງ ປທສ, ປະທານຈັດງານວາງສະແດງ Lao ICT Expo 2016 ໄດ້ກ່າວບາງຕອນວ່າ: ກະຊວງ ປທສ ມີພາລະບົດບາດ ແລະ ການຄຸ້ມຄອງມະຫາພາກດ້ານ ໄອຊີທີ. ໃນໄລຍະຜ່ານມາກະຊວງ ໄດ້ສຸມໃສ່ພັດທະນາໂຄງຮ່າງເຕັກນິກທີ່ທັນສະໄໝ ແລະ ມີຫຼັກສະນະຍຸດທະສາດຂອງຊາດ ເປັນຕົ້ນແມ່ນ ສູນອິນເຕີເນັດແຫ່ງຊາດ, ສູນຮັກສາຄວາມປອດໄພທາງໄຊເບີ, ສາຍສົ່ງແຫ່ງຊາດ, ດາວທຽມສື່ສານ ດວງທໍາອິດຂອງ ສປປລາວ ພ້ອມດຽວກັນນັ້ນ, ກະຊວງ ປທສ ໄດ້ສ້າງ ແລະ ປັບປຸງກົດໝາຍ-ນິຕິກໍາລຸ່ມກົດໝາຍຫຼາຍສະບັບເພື່ອຄຸ້ມຄອງ ແລະ ດັດສົມມະຫາພາກ ເຊັ່ນ: ກົດໝາຍວ່າດ້ວຍການໂທລະຄົມມະນາຄົມ (ສະບັບປັບປຸງ), ກົດ ໝາຍວ່າດ້ວຍການໄປສະນີ, ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກໍາ ທາງລະບົບ ຄອມພິວເຕີ ແລະ ກົດໝາຍວ່າດ້ວຍເຕັກໂນໂລຊີການສື່ສານຂໍ້ມູນຂ່າວສານ, ຊຶ່ງມີການສົ່ງເສີມໃຫ້ຈຸລະພາກເຄື່ອນໄຫວທຸລະກິດໃຫ້ບໍລິການດ້ານໄອຊີທີດ້ວຍກົດໝາຍ ແລະ ໜ້າທີໃນການຮັກສາຜົນປະໂຫຍດເຮັດໃຫ້ພື້ນທີ່ໃຫ້ບໍລິການຄວບຄຸມ 90% ຂອງທັງໝົດທົ່ວປະເທດ, ເຖິ່ງຢ່າງໃດກໍ່ຕາມສິ່ງທ້າທາຍຂອງພວກເຮົາແມ່ນຄວາມຮູ້ ແລະ ຄວາມສາມາດໃນການນໍາໃຊ້ ອຸປະກອນໄອຊີທີໃຫ້ເກີດປະໂຫຍດ ແລະ ປອດໄພເພາະໄອຊີທີໃຫ້ທັງຄຸນປະໂຫຍດ ແລະ ໃຫ້ໂທດແກ່ຜູ້ນໍາໃຊ້.

  ສະນັ້ນ ກະຊວງ ຈຶ່ງໄດ້ສ້າງຄໍາຂວັນງານ ລາວໄອຊີທີ ເອັກສໂປ 2016 ວ່າ: ຮ່ວມກັນສ້າງເສດຖະກິດສັງຄົມ ດິຈິຕອນ ທີ່ປອດໄພ ແລະ ເປັນປະໂຫຍດ ເພື່ອສ້າງ ໃຫ້ຂະແໜງການ ໄອຊີທີ ເປັນເຄື່ອງມືທີ່ສໍາຄັນ ໃນການຂັບເຄື່ອນຂະ ແໜງການຕ່າງໆກໍ່ຄືການພັດທະນາເສດຖະກິດ-ສັງຄົມໃຫ້ບັນລຸຕາມເປົ້າໝາຍ ແຜນພັດທະນາເສດຖະກິດ 5 ປີ ຄັ້ງທີ່ VIII (2016-2020) ຂອງລັດຖະບານ ສປປ ລາວ.

  ປັດຈຸບັນ ສະພາບການຂະຫຍາຍຕົວຂອງໄອຊີທີມີລັກສະນະກ້າວກະໂດດຢ່າງບໍ່ຢຸດຢັ້ງ ແລະ ເຊື່ອມໂຍງກັບພາກພື້ນແລະສາກົນ. ມີບົດບາດສຳຄັນ ແລະໄດ້ກາຍເປັນເຄື່ອງມືຫຼັກໃນການພັດທະນາປະເທດໃຫ້ທັນສະໄໝ.